Jannat mein liqour prohibition

Hua youn ki Jannat mein madira pe prohibition laga diya gaya. Aise mein Sriman Mohammad Ali Jinnah, tahelte hue Yamlok, Nehru se milne pahunche. Aage ka haal:



"hi Jawahar", achanak sunke Nehru ji sakpakaye
dekh Jinnah ko yamlok mein, thoda sa ghabraye
formality mein apna khaali haath milane ko badhaya,
kisi prakar dwesh ko apne kaabo mein rakh paye

"kaise hua jannat-e-firdaus se is or aanaa,
hum to samjhe the bhool chuke tum hisab puraana"
vaadi kutil, nayan teeksha dekh Jinnah muskaye,
"kyu bhai, lagta nahi ki tum bhi humko bhool paaye"

"darasal Jannat mein maykhano pe laga diya prohibition
aur yahan to tum gatak rahe ho whisky bina inhibition
socha barso baad hum bhi purane dosto se mil aayein
aur lage haath urvashi menka ke bhi darshan ho jayein"

"besharm, na-maqool" youn kehkar nehru ne lataada
taan bhhrakuti teekhi, jaise isharo mein bhi fatkaara
"72 kam pad gayi aur janaab yahan najar daudaate hain
hum to 2-4 apsaraon se jaise taise kaam chalate hain"

"chhodo yaar tum gussa aur peg banao,
aur kya chal raha hai India mein thoda batao
tumhari Indian govt aakhir mujhe kyu nahi karti sammanit
arrey ghooro mat aise yaar jara brandy pilao"

"tumko"" tumko!" jaise apni shruti pe hi bharosa naa kar paaye
peg banate banate hi, Nehru jor se chillaye
"kyu karne lagi tumko Indian govt sammanit
tum jaise ko to hum jooto ka haar pehnaaye"

chehre pe Jinnah ke muskaan abhi bhi gayi nahi
"dekho Jwahar bado ka youn apmaan karna sahi nahi,
mujhe yakeen nahi hota tum abhi bhi aise moorkh ho
Badappan hai mera jo aajtak ye baat meine kahi nahi"

"India ko sada sada maanne honge mere aehsaan
kya tarakki kar paata India, jo naa hota Pakistan?
tumhe nahi akal mein tumhe samjhata hoon,
aaj tumhari buddhi ke kapaat mein khol jaata hoon."

"Kasab hota Indian citizen, jo naa hota Pakistan
Indian passport se hoti, kitne terrorists ki pehchaan
Akahnd Bharat mein fir milti sharad hamare Osama ko,
socho fir kya jawaab dete Manmohan, Barak Obama ko?"

"Rawalpindi ke general, Indian army mein jab bharte tum
Zulfikar Bhutto ke jaise, fansee se fir marte tum
Arthvyavastha ki tumhare fir kya hota haal?
India ki hoti vo haalat, jo Pakistan ki hai filhaal"

Sun faansee ki baat Nehru ekdum sihar gaye,
bhool dwesh saara, do hi minute mein bifar gaye,
"Award chhodo mein mandir tumhare banvaoonga,
Bahu Sonia ko turant telegram bhijvaaonga"

"Manthan mein vish peekar jaise mahaan hue Shiv Shankar
Aise hi partition kara, ahsaan kia tumne bhayankar"
Jab bhi peene ka man kare, bejhijhak aana mere paas
aur haan bata do agar koi apsara pasand ho khaas!"